Ua toe faagasolo fuafuaga a le Malo mo le atinae o le tatou atunuu i lenei tausaga fou, ma ua faailoa e le Minisita o Faatoaga ma Faigafaiva o se sui o le soa komiti a le Malo mo le atina’e o le tasi le miliona tala, e sefulu itumalo faapalota ua masalomia i lo latou faaaoga sese o seleni o le atinae, e faasino lea i le 200 afe tala na muamua faamatuu e fausia ai ofisa tutotonu e tapuvae tasi iai galuega o le poloketi.

E lei faailoaina e le Minisita le susuga Laauli Leuatea Polataivao Fosi Schmidt poo ai itumalo ia e sefulu, ae o lana saunoaga i le polokalame o le Soalepule ua taofia le toe ave o ni seleni i ia itumalo, ae sei fai suesuega.

O le tausaga fou lenei ua amata faamatuu ai vaegatupe ta’i tasi le miliona tala mo itumalo ua mautu a latou fuafuaga o le atina’e i le faamoemoe e tatau ona amata faatino ai loa fuafuaga ua faataoto a itumalo taitasi mo le manuia o tagata o itumalo faapalota o loo usitaia ma mulimulita’i i faiga faavae o le poloketi.

E 40 itumalo e pei ona faailoa e Laauli ua mautu ma mae’a ona fausia o latou ofisa tutotonu o fono faavae mo le faagaioia o galuega o le poloketi.