O le itumalo faapalota o Lepa ma isi itumalo e iva e maua ai le sefulu o itumalo faapalota ua taofia e le komiti o le poloketi o le tasi le miliona tala, ona toe faamatuu iai ni seleni o le poloketi.
Na toe tuliloa le sui o le komiti o lea fuafuaga tau faiga faavae a le faigamalo fou le afioga i le Minisita o Faatoaga ma Faigafaiva, i lea mataupu a o auai i le tatalaina o le ofisa tutotonu o le fono faavae a le itumalo o Faleata 4 i le Aso Toonai ua mavae.
Faaalia e le minisita le susuga Laauli Leuatea Polataivao Fosi Schmidt o nisi o itumalo faapalota ua aafia ai, o Faleata 3, ma Aana Numera 2.
O le mafuaaga ua le mulimulitaia taiala i le faaaogaina o tupe o le poloketi ma e mafua mai i le 200 afe na faamatuu muamua.
Ua faailoa foi e Laauli ua mae’a tuuina atu tusi i taitaifono o komiti o itumalo e sefulu ua aafia i le faaiuga e le toe faamatuuina iai ni seleni, ma o taitaifono o sui faipule foi o itumalo ua faasino tonu iai le faaiuga.
