Ua faia le faaiuga a le Komesina o leoleo, falepuipui ma le ola toe fuataina e faamuta le toe avea ma Malu o le malo o le leoleo asiasi le susuga Li’o Faataumalama lea ua mae’a ona faia iai moliaga a le vaega o amioga taualoa a leoleo le Police Professional Standards Unit, e mafua i le mau a leoleo ua ia soli aiaiga o le tulafono faaleoleo e ala i lona faia o se suesuega faalilolilo o le faalavelave tau taavale lea na maliu ai Tuuau Faasavalu e aunoa ma se ioega poo se faatagana mai le Komesina o leoleo.
E lei faamautuina se aso e suesue ai moliaga i le faamasinoga faaleoleo, ae o le Aso Tofi o le vaiaso nei na tuuina atu ai e le Komesina susuga Auapaau Logoitino Filipo, lana faaiuga tusitusia i le leoleo asiasi ma le leoleo taailua o loo aafia uma, i le faamalolo lē tumau mo le 10 aso.
Ua faailoa ai foi e le Komesina i lana faaiuga o le a ia faamuta le toe avea o Li’o ma le tasi o Malu o le Malo ona ua o la soli aiaiga o le tulafono faaleoleo i se amioga ua lē talafeagai.
O le aiaiga foi o lea faaiuga e tatau ona tali atu i laua ua tuuaia i le mafuaaga o le faamuta ai o le la tautua faaleoleo i totonu o le sefulu aso ua faamalolo lē tumau muamua ai, afai ae lē maua se tali o le a faamuta loa ma lē toe avea i laua ma Malu o le Malo.
Na fesiligia le alii leoleo asiasi ina ua maua se fesootaiga mo sona finagalo.
Le susuga Li’o Faataumalama o loo umia le tulaga o le leoleo asiasi poo le police inspector.
