E silia le fuainumera o tina ma tamaitai mai i Upolu nei sa auai i le polokalame o le faamanatuina o le Aso Faapitoa o Tina i le lalolagi sa faatinoina i le Maota o Tooa Salamasina i Apia.

O lenei faamoemoe sa tatalaina aloaia e le Minisita o le Matagaluega a Tina ma Tamaitai, Atina’e o Nuu ma Aga Fesootai, Afioga Leota Laki Lamositele Sio.

“Ua o tatou tapisa i lalo ifo o lenei malu i lenei taeao se’i o tatou patipatia faatasi le atoaga o le 20 tausaga o le faamanatu a Samoa o le aso faapitoa o tina e amanaia ai lo latou tiute tāua i le atina’ega o nuu, ekalesia, aiga aemaise le atunuu i lona tamaoaiga.

“O se tofa fetalai a le malo e faatāua ai atina’e o galuega faifaipea o loo faatinoina e tina mo le manuia o tagata uma.”

Saunoa Leota o le manatu autu o lenei tausaga e faatusa lea i sona uiga faigofie i le tiute o tina i totonu o aiga.

“O se galuega iti a tina sa lelei tapena mautu lona faatinoga lea ua ‘ae’ae ai Samoa e le gata i taimi o le sologa lelei ae tua foi iai i taimi o e fesouaina ai i faigata.

“E lei faatumutumulima pe pa’ole la outou pitolaau, sa outou tapena faatamaitai toaga fausaga o ananafi lea ua outou sapi ai i le asō.

“Manatua ua outou saisai faamatā’afa nei, e tautala aso a outou galuega.”

O loo faia pea i tausaga uma polokalame faaauau i le taumafaiga e taofia ai sauaga i tina ma tamaitai, o se polokalame e siitia ai lo latou agavaa  i le atina’eina o le soifua manuia o aiga faapea ai ma polokalame e siitia ai agavaa i le taitaina o auaunaga ma pulega lelei.