O se tasi lenei o mataupu o loo taumafai ai le asosi o tausi soifua i fale tipitipi i le Pasefika le Pacific Islands Operating Room Nurses Association (P.I.O.R.N.A) o le tulaga moomia o tausi soifua ma le tulaga i totogi o lenei auaunaga.
E pei ona faaalia ai i le tatala aloaia ai o le fonotaga a le asosi e le Peresitene, Patea Natasha Mamea i lenei vaega e pei ona iai i le aafia ai o le Pasefika i le faamai o le Koviti-19.
“E tele lava nisi o mataupu tāua o loo silasila iai le asosi e folasia i lenei fonotaga.
“Ua o se taimi tatau foi e faaleo ai lagona ma manatu o tausi soifua i le fale tipitipi lo latou tulaga e pei ona iai le faama’i o le koviti i tausaga ua mavae o mau ia e faailoa ai le moomia o tausi soifua.
“O se auaunaga e iloga lona tāua i totonu o le Pasefika ma e umi lava le savaliga o loo savalia e mafai ai ona faataunuuina faamoemoega uma o loo tatou miti iai.”
E pei ona iai le manulauti o lenei fonotaga ia tutu faatasi e ala i le faaleleia o le tautua faatausi soifua i le Pasefika na lu’iina ai e Peseta i sui uma o loo auai i lenei fonotaga ia faaaogā aso e tolu ua atofa mo lenei faamoemoe e faasoa ai manatu ma lagona a o auala foi auā le agai i luma o lenei auaunaga.
“O le ausia o taotoga saogalemu e faasaoina ai le soifua ma le siitia o le soifua maloloina o se gasegase e moomia ai le tele o alafua e puipuia ma saogalemu ina ia taunuu manuia.
“O se lu’i foi lea mo Taitai o le Pasefika o Taitai o lenei auaunaga ou te aumaia ai se faaupuga mai se tasi o fomai lauiloa a le Faalapotopotoga o le Soifua Maloloina i le Lalolagi e faapea ‘Ia tausi ia i latou ma ia totogi lelei i latou ma mea o loo galulue ai’.
“O le naunautaiga lea o le P.I.O.R.N.A. ia lelei aoaoga ma maualuga le aoaoina o tausi soifua ma ia maua ni o latou totogi lelei.”
