Fai mai le Palemia, Chris Hipkins na te le o iloa tonu le mafuaaga ua agai ese ai Meka Whaitiri mai le Leipa ma ua faigata ai foi ona faia se faamatalaga pe sa tatau ona sili atu ona tuuina iai le lagolago talafeagai.
E lei leva nei ona toe foi mai Hipkins mai le UK i le faauuga o le Tupu o Salesa ma ua toe faaauau ona tofi o le Palemia o le atunuu.
E le o toe po se lilo o le faipule o le faaitu o Ikaroa-Rawhiti o Meka Whaitiri sa avea foi ma minisita i fafo o le Kapeneta ua agai ese ma le Leipa ma agai sa’o i le Pati a Maoli a o iai le Palemia i atunuu i fafo.
O le vaiaso nei ua lipotia ai le uluai taimi ua faia ai se faatalanoaga a Whaitiri i le televise a Niu Sila talu ona tulai mai lea mataupu, ua ia ta’ua ai sa ia fia auai i se pati na te lagona e faalogoina ai sona manatu.
Sa fesiligia foi pe na te talitonuina le alii Palemia, fai mai Whaitiri e leai ae na te talitonuina lona ia lava aiga, e ui mulimuli ane sa ia toe taumafai ai e faasa’o ana faamatalaga.
Ina ua fesiligia le Palemia i sona finagalo i le mataupu na ia ta’ua ai o le tulaga lava ia i le agai ese ma le pati o le faaiuga lea a le faipule.
Ua ia fai lana faaiuga, folafola i le lautele ma ua mae’a lea tulaga ma ua tatau loa ona taulai i isi mataupu o ta’ua e pei o le tala faatatau o le tupe a le atunuu i le vaiaso fou.
