O lenei fonotaga e tāua tele lea mo sui oi Malo ma le Pasefika aemaise ana paaga mai le vaega tuma’oti.

I lenei fonotaga sa mafai ona saunoa ai le Minisita o Galuega Tetele a le Malo, Afioga Olo Fiti Afoa Vaai e tusa ai ma fuafuaga a Samoa e agai tonu lea i le autu o lenei fonotaga o atinae faaauau i galuega tetele i le Pasefika.

“Ua mae’a iai le fuafuaga a le Matagaluega ua mae’a faalauiloa mai le tausaga 2023-2028 o se galuega o loo mafai ona tuufaatasia e le Malo, o le vaega tuma’oti aemaise ana paaga ina ia mautinoa ai o loo sologa lelei auaunaga i lenei itu.”

O lenei fuafuaga e pei ona faaalia e le Minisita o loo agai lea i le iloiloga o vaega o faiga faavae ma tulafono o loo lima taitaiina ai le auauanga a le Matagaluega.

“O loo faipaaga nei ma nisi o faalapotopotoga e ala i fesoasoani tau seleni e mafai ai ona faatino nisi o galuega tetele a le Malo o loo iai ni ona faaletonu aemaise o nisi o poloketi e agai i le puipuia ai o le atunuu mai suiga o le tau.

“O vaega nei o loo ave ai le faamuamua e aofia ai le uafu, malaevaalele i Faleolo ma le uafu faavaomalo.

“Ua mae’a ai nei le audit program a le International Civil Aviation Organization mo vaega o loo faatino ai galuega a le malaevaalele ina ia faatāua pea tulaga i tulafono mai lea faalapotopotoga faavaomalo.”

O lenei foi fuafuaga mo le lima tausaga o le a siitia ai galuega i auala ma alalaupapa ae le gata i lea o nisi o auaunaga i femalagaa’iga.”

O le vaega mulimuli na faailoa e Olo i lenei fuafuaga o le tulaga i tagata faigaluega o loo iai le tomai ma agavaa ina ia maua foi avanoa e faalauaitele ai le tomai auā le tautuaina o le atunuu i lenei Matagaluega.

“O se tasi lenei o faamuamua a le Malo o Samoa o ana tagatanuu ma resource o loo maua ai, e iai le talitonuga o tagatanuu lava o loo muamua aafia i suiga o le tau ma e ao ina o latou silafia foi le tulaga e ao ina faatino ai vaega auā le saogalemu o le atunuu.

“Ae o loo malosi foi le fesoasoani faapaaga a nisi o Malo e pei o Niu Sila ma Ausetalia ina ia lelei ma mautu ana galuega faatino.

“O nisi o itu o loo silasila iai o le faafitauli o loo faalagolago tele ai i oloa mai fafo, aemaise ai le maualuga o le tau o le suauu.”