O le amataga o le masina nei lea na malaga atu ai le Minisita o Faatoaga ma Faigafaiva Afioga Laauli Leuatea Polataivao Fosi e auai i se fonotaga a Minisita mai le Pasefika ma le Malo o Saina i Nanjing.
O lenei fonotaga e taulai lea i ni mataupu tau i faatoaga ma faigafaiva e ono galulue faatasi ai le Malo o Saina ma le Pasefika.
I le saunoaga a le Afioga i le Minisita na ia folasia ai nisi o mataupu e ao ina silafia e le fonotaga.
“O le gataifale o loo pua’ina mai ai le fofoga taumafa o tagata o le Pasefika, ae peitai o loo tele le popolega i le tele o faafitauli o feagai ai nei.
“E aofia ai le fagota faasolitulafono o i’a ma le soona fagotaina o le gataifale, o le tulaga i suiga o le tau ma isi faafitauli.
“O le ala lea e pito sili ona tāua ai lenei fonotaga auā le manuia o faigafaiva i atunuu.”
Na toe faapupula ai e le Minisita le tulaga o le mataituina lelei o le fagotaina o le gataifale ma ogasami.
“E pei ona silafia ai o le taimi nei o loo mataitu ai le tulaga i fagotaga ona o le tulaga i le i’a lea o le tuna ma isi e le mafai ona taofia lo latou agai i soo se vaega o le ogasami e aofia ai le Exclusive Economic Zone.
“E mafaia ona tatou galulue faatasi ina ia mafai ai ona puipuia o tatou gataifale mai le tele o faafitauli.”
Mo Samoa lava ia na ta’ua ai e Laauli o loo unai malosi i le aufaifaiva ina ia galulue ma lagolagoina taumafaiga a le Matagaluega i le itu tau i le fagotaina o le gataifale.
“O loo iai se komiti faufautua tau i fagotaga o loo faia pea faatalatalanoaga ma sui faifaiva uma i le atunuu ina ia malamalama le aufaifaiva i mataupu nei o loo fai ma faafitauli.
“O loo manino lava a naunau ia lelei se mea ma ia malamalama e ao ina lelei le auala e fesootai ai ma o tatou tagata.”
Na faamalosiau ai foi le Minisita i minisita uma o le Pasefika sa auai e tāua lava le galulue faatasi ina ia manuia atina’e o loo fuafuaina mo tagata lautele.
