Ua iai nei ni masini fā’ata poo X-ray i le malaevaalele i Fagalii o le a suesue lelei ai pasese ma a latou uta ina ia mautinoa le saogalemu o tuaoi o Samoa mai le faaulufale mai o ni oloa e lē faatagaina, aemaise o fualaau, pauta ma laau faasāina.

O isi oloa o laau malosi e faaulufale i le atunuu ae leai ni pemita faataga poo ni laau malosi e le tatau ona aumai i lo tatou atunuu.

O le toe tatalaina o le malae vaalele talu ai nei na faailoa ai le fesoasoani a le Malo o Niu Sila ua faatupe ai lea masini fā’ata sa lei iai muamua i tausaga ua tuanai sa faagaioia ai lea malaevaalele laititi mo malaga i le va o Samoa e lua, ma malaga i le va o Upolu ma Savaii.

O le tali a le minisita o pulega o malaevaalele i le amataga o le vaiaso i faitioga agai i le saogalemu o le malaevaalele i Fagalii o loo faailoa ai ma le mae’a faatutūina o ia masini fā’ata o le tasi mo le sueina o pasese, ae o le isi mo le sueina o uta.

O loo manatua pea nisi o gaioiga solitulafono sa tutupu mai i lea malaevaalele i ni tausaga ua mavae, i le maua ai o laau faasāina o le maruana sa taumafai nisi e ave i Amerika Samoa.

O le taimi a o fealuai le tasi o kamupani vaalele o le Samoa Air sa tulai mai ai lea gaioiga faasolitulafono.