I se tala mai le Pasefika. O le malo o Tonga lea ua lipotia o le uluai atumotu lea o le Pasefika ua sainia se maliega mo le faataitai ai o se isi ituaiga faiga e maua ai le eletise e ala i le faaaogaina o galu, wave energy technology.
E le o toe po malaē i le tulaga o iai le tau o le eletise i soo se atunuu ma ua aafia ai soifuaga o tagata i aso taitasi, ma i Tonga lava ia ua ta’ua i le lipoti e toatele aiga ua le o toe maua se eletise.
O se suesuega sa faia na faalauiloa lona iuga i le 2021 na iloa ai o le Oceania le itulagi aupito i taugata ai le eletise i le lalolagi.
O le fuafuaga fou la lea e pei ona faailoa e le malo o Tonga, o le a faaaoga ai faiga faatekonolosi e pue ai le malosiaga mai galu ma gaosia ai ma le eletise.
O le a faatulaga foi ma generators poo afi e fesoaoani i le tapueina o le eletise.
E lua vaega e vaevae iai le poloketi, o le vaega muamua e amata i le faaiuga o le tausaga nei, fai mai i latou o loo faagaioia afai ae manuia ia taumafaiga e le taumate o le a faataoto ai foi se alafua mo le Pasefika ma ona atumotu.
