Ua le mafai ona alu ese ma Samoa se ali’i o se tagatanu’u o Papua New Guinea i sana talosaga e fia alu e asi lona tua’ā tina o lo’o a’afia i ni gasegase o le tino, ona toe foi mai lea e tali i moliaga e lima o lona faia o se gaioiga solitulafono e ala i le fa’atumu o pepa a le ofisa o femalaga’iga a le malo o Samoa, i le faamoemoe e na te umia ai se Tusifolau Samoa.

Sa talosaga le ali’i o Ivaan Jackson e ala i lana loia mo se fa’atagaga a le fa’amasinoga e toe fetu’una’i ai aiaiga o lo ‘o tatala ai i tua i le fia malaga e asi lona tinā, peita’i ua talia e le fa’amasinoga le tete’e a leoleo, a tu’u iai le avanoa o le aluga lea e lē toe foi mai ai e tali moliaga.

O loo molia foi le ali’i o Ivaan Jackson i lona taumafai e faia i se tagata faigaluega o le ofisa o femalaga’iga se gaioiga fa’aālātua, le bribery. Ua le mafai ona tu’ua ai le atunu’u e lea tagatanu’u o Papua New Guinea ma ua fa’atali ai le aso 30 o le masina nei o Novema e vala’au ai molimau a leoleo e lagolago ai moliaga o loo ia tē’ena.

O Iulai o le tausaga nei na faia ai e lē ua molia le gaioiga solitulafono ma o’o ai i leoleo mo su’esu’ega ma faia ai moliaga i le aso 8 o Aukuso. O Aperila o le tausaga fou sa fa’atulaga e fa’atoa vala’au ai molimau o lea mataupu tau fa’amasinoga peita’i ua tu’u mai i le faai’uga o le masina nei, ina ia vave su’esu’e ai ma faia se faai’uga.