O le vaiaso fou lea ua fuafua le faalapototoga ua ta’ua o le Autalavou Mo Keriso poo le Youth For Christ e faamanatuina le atoaga o lona 50 tausaga talu ona faavae mai.
O lea faamoemoe ua iai le fuafuaga a nisi o i latou sa amataina lea faalapotopotoga faapea i latou sa auai i nisi o tausaga o loo aitau malele atu i atunuu i fafo e fia malaga atu lea i Samoa e patipatia faatasi le agalelei o le Atua talu ona faavaeina mai le Youth For Christ i Samoa.
O le susuga i le faafeagaiga ia Tavale Matai’a ma lona faletua ia Alison Matai’a na laua amata ona faavaeina le Autalavou Mo Kerisi i le tausaga e 1973 i le masina o Fepuari.
Ina ua toe taliu atu le susuga ia Tavale Matai’a ma lona faletua i Samoa ina ua mae’a aoaoga sa iai i Niu Sila ma galulue ai faiaoga i le Kolisi o Leififi i le tausaga e 1972 ae o lona faletua ia Alison sa faiaoga i le Apia Primary.
Na laua vaavaai ma maitau i le tulaga ua iai tupulaga talavou i le taulaga faatau o Apia ua amata ona o fai kegi, a ua iai foi le tulaga ua femisaa’i ma tauaimisa ma fufusu tupulaga ae faatitino lava i faaiuga o vaiaso.
Ma o iina na tupu ai se lagona alofa ia laua ma lona faletua ua tatau ona fai se galuega alofa i tupulaga nei e toso ese ai mai luga o auala, aemaise ai o le taimi lena ua amata ona ofi atu laau faasāina e aafia ai olaga o tupulaga talavou.
Na faatuina e le susuga ia Tavale Matai’a ma lona faletua ia Alison se fale kofe i totonu o Saleufi ina ia mafai ona agai atu iai tupulaga talavou.
Ma o lea auaunaga sa ofo fua atu lea kofe ma keke mo tupulaga talavou uma lava i lea pitonuu o Apia.
Ua fai ma masani a kegi le afea o lea fale kofe i aso uma, ma o iina na amatamata ai loa se feagaiga mafana mo tupulaga uma lava i totonu o le taulaga o Apia e ala i pesepesega faale agaga.
Ua amata ona fai a latou aoga Tusi Paia ma mafutaga tatalo e amata i le 7 i le afiafi ae uma le 11 i le po.
O le susuga ia Eti Kapisi, Tom Matai’a ma le susuga ia Ene Petaia na latou fesoasoani i le taina o kitara i le amataga o le mafutaga.
O le masina o Fepuari i le tausaga e 1973 na ofi mai ai loa i totonu le Youth For Christ na avatu e le palagi e igoa ia Dr Ray Arison.
Na fesootai lea Misionare i nisi iloga o Samoa le susuga ia Max, faapea le susuga ia Ene Sagala i le fia faatuina lea o se Youth For Chist i Samoa.
Ma o le avanoa lea sa maua ai loa le avanoa ma le susuga ia Tavale Matai’a e tatau ai ona sau loa e taitai le galuega a le Autalavou Mo Keriso.
Sa ioeina e Tavale lea galuega lelei ma sa ia faamavae ai loa ma lana galuega faiaoga ae avea loa o ia ma taitai poo le faatonu o le Youth For Christ i Samoa.
Ua tuputupu ma ua ola le galuega i tupulaga talavou, ma ua oo foi ina maua avanoa e momoli atu ai le talalelei ma le faaolataga a Iesu i totonu o aoga.
Ua agai atu talaiga i nuu i tua ma autalavou, ma ua faalautele le faleie o le galuega, i lea vaiataimi seia oo mai lava i le taimi nei.
O le tumutumuga o lea faamoemoe maualuga ina ia faamalosia tupulaga talavou o Samoa e faaaogāina o latou olaga mo le Alii e ala i totonu o ekalesia o loo galulue ai ma faaaogā tatau ai le taleni ma meaalofa mai le Atua.
Ua see ese mai le susuga ia Tavale Matai’a ma lona faletua ia Alison Matai’a ma galulue i le laua ekalesia ua valaauina ai e le Atua, ae see atu nisi o tamalii ma faletua ma avea ma faatonu ma faaauau pea le galuega seia oo mai i le taimi nei o loo faaauau pea e nisi o tamā ma tina faapea tupulaga talavou le galuega i lalo o le taitaiga a le susuga i le faatonu ia Peniamina Malu lea ua pale mai i le taimi nei.
