Ua sauni le kamupani vaalele o le Virgin Blue a Ausetalia e toe tulaueleele i Samoa lona vaalele tele 737-800 pe a toe amatalia ana malaga i le va o Samoa ma Ausetalia i le vaveao o le Aso Lulu o le vaiaso nei, lea ua faamoemoe e taunuu i le malae vaalele faavaomalo i Faleolo i le 4 i le vaveao.

Ua sauni le pulega o tagata tafafao e faatali lea malaga i le faafeiloai o pailate ma le auvaa faapea le pasese o le a malaga mai ai.

E le o faailoaina pe toafia se pasese i lea malaga ua toe afea ai lo tatou atunuu, talu ona tapunia tuaoi i malaga masani i le tausaga e 2019 ona o le faamai Koviti-19.

E 3 malaga a le Virgin Blue ua faatulaga i le vaiaso, e lua malaga mai le aai o Sini ae tasi le malaga mai Brisbane.

Ua tolu nei kamupani vaalele ua faia malaga i le va o Samoa ma Ausetalia, o le Qantas, Virgin Blue, ma le Fiji Airways.

O le tauvaga a ia kamupani vaalele e tolu o le a maua ai ni pasese pa’ū mo tagata e fia malaga mai i Samoa, aemaise foi o tatou tagata e fia malaga atu i Ausetalia.

O Niu Sila i le va o Apia ma Aukilani ua na o le kamupani vaalele o le Air New Zealand.

Ua iai malaga a le Fiji Airways mai Ueligitone, afe i Nadi i Fiti ma tuusa’o mai ai i Samoa.