O le Sui Palemia o NIu Sila, Carmel Sepuloni ua sauni e faatino se tasi o tu aupito umi a Samoa, o le laei foi o le tamaitai Samoa, le malu e pei foi ona sa ia faasoa ai i upega tafailagi i se taimi ua tuanai o loo ia galue i le tulaga lea.
Ua faamaonia i lipoti a le Herald i le asō o lea ua sauni le tamaitai Sui Palemia mo lea faamoemoe.
O loo ta’ua i le lipoti se faamatalaga a Sepuloni sa ia talanoa atu i le tufuga ta tatau Liaifaiva Levi ma ua faamautu nei o le aso 4 o le masina o Iulai o le a faataunuu ai.
O le tamaitai Sui Palemia e iai ona sootaga i Tonga ma Samoa ona o lona tuaa tamā o Faatalii Kamisi Sepuloni.
O lona alalafaga i Samoa, o Vailele.
Ua toatele ua faailoa lo latou agaga fiafia ma le faafetaia foi o sia tamaitai ma lona faatāuaina o ona tupuaga Pasefika.
