O faitioga agai i le matagaluega o aoga taaloga ma aganuu a o lei filifilia le afioga A’eau Chris Hazelman e avea ma faauluuluga o lea matagaluega tele a le Malo, ua sauni e tali iai ina ua see atu e tauave le tofiga o le Ofisa Sili o pulega.
O le mae’a ona faafeiloai o le afioga A’eau e le Minisita ma le matagaluega i le Aso Gafua o le vaiaso nei, na maua ai lona avanoa e tali i fesili i le feiloaiga ma le vasega o tusitala i le atunuu.
Na tali foi le Ofisa Sili le afioga A’eau Chris Hazelman i le tasi o atugaluga ua mapuna a’e ona o galuega faavaitaimi i le tuua o le galuega faafaiaoga e nisi, ae malaga mo ia galuega.
Faaalia e A’eau ua laugatasia uma auaunaga eseese tau galuega i le faafitauli lea, peitai o se mataupu e tele ni vaega e tatau ona silasila iai e pei o totogi, aua o le mafuaaga lea o le tuua e nisi o a latou galuega i tomai aoaoina o loo latou umia, ae faaaoga le avanoa i galuega faavaitaimi ona e lelei tupe e maua ai i totogi.
