O le po nanei lea e fuafua e faimalaga ai le toasefulufitu a le Olimipeka Faapitoa a Samoa o i latou e iai manaoga tumau i le tino ma le mafaufau lea o le a auai e tauva i taaloga faavaomalo e fai i Berlin Siamani.
Na saunoa le Faatonu Unasa Elizabeth Ah Poe o loo gafa ma le Olimipeka Faapitoa a Samoa, i le auga o le a tauva ai alo o Samoa i lenei faamoemoe tele.
“O le auga lava o le auai ai o le tatou ‘au lenei mai Samoa o le faamoemoe lava i avanoa tutusa ia mafai ona saofagā ai alo ma fanau nei e iai manaoga tumau o le tino ma le mafaufau i avanoa e le gata i taaloga a o nisi vaega o le soifuaga.
“E 3 taaloga o le a tauva ai alo a le atunuu, o le taaloga volipoli a tamaitai lea ua iai tatou tamaitai e toavalu o le a tauva ai, o le faataavale polo e toalua i laua o le alii ma le tamaitai ma le afeleti e toatasi si alii lea o le a tauva ai i le 100 mita.
“E toafa faiaoga o loo fesoasoani i nai alo nei mo a latou tapenaga auā faagatama.”
O le faamoemoe a le ‘au a Samoa na faafetaia ai e Unasa le lagolagosua malosi a pisinisi aemaise nisi o matagaluega ina ia faataunuu le auai o alo ma fanau nei i taaloga faavaomalo.
“E momoli ai le faafetai tele lava i le kamupani telefoni a le Digicel Samoa i la outou lagolagosua i lenei taumafaiga aemaise ai o le Matagaluega o Aoga faapea le faletupe a le Samoa Commercial Bank ma nisi pisinisi tuma’oti aemaise nisi o le atunuu sa faailo la latou fesoasoani i tapenapenaga a la tatou ‘au.
“E le faagaloina le fesoasoani a le Konesula o Siamani i Samoa nei aemaise le Hai Komesina o Peretania i Samoa nei, faafetai tele lava i le manatu mai i alo ma fanau o loo iai manaoga tumau i lo latou loto atunuu e fai ma sui o Samoa i lenei faamoemoe.”
O le lona fā ai lenei o taaloga ua faatautaia i le mae’a ai o le tai fa tausaga ma e lei misi lava le avanoa a le ‘au a Samoa e tauva ai.
O le lona tolu o taaloga lea sa faatautaia i Abu Dhabi lea na faamanuiaina ai le ‘au a Samoa i le 3 pine auro, 4 pine siliva ma le 1 pine apamemea.
E tolu vaiaso o le a auai ai le ‘au a Samoa i Berlin mo lenei faamoemoe.
