O loo iai nei i Ausetalia le aulakapi pa’i a le atunuu e tapena ai mo le taamilosaga o le ipu a le Asia Pacific Youth Touch Tournament Cup.
I se faatalatalanoaga ma le Peresitene a le Lakapi Pa’i i Samoa, Matiu Tuileva Tuileva, o se fiafiaga tele lea mo le ‘au a Samoa le auai ai i lenei faamoemoe
“Ua tapena le ‘au a le atunuu mo lenei faamoemoe tāua e taaalo ai ma nisi o ‘au iloga o le faagatama.”
“Sa faailoa mai foi e le Faiaoga ma le Taitai Malaga e le o iai ni suiga o tama taaalo e le o iai foi se isi o iai se manu’aga mai toleniga ma tulaga faapena.
“O le tatalo lava ia faataunuuina ma le manuia lo latou taumafai i le taamilosaga atoa.”
Na ta’ua ai e Matiu o le ‘au lenei e le o iai se sui mai Samoa nei.
“O se faanoanoaga tele lea ona ua misi e a tatou tama o loo aumau i Samoa ona o le tulaga i le utiuti o le taimi ma a tatou resources ia ua le mafai ai ona pa’au mai alo mai le atunuu e fai lo latou sao.
“O se vaega tele lea ua mataituina e le kalapu mo le agai i luma ina ia mafai ona faataunuuina le faaaogaina o tatou local players e taaalo i taamilosaga i fafo mai o Samoa.
“O i latou ua filifilia mo lenei ‘au sa filiina mai lea e le Kalapu Lakapi Pa’i a Samoa o loo i Kuiniselani.
“I le tulaga o fesoasoani mo lenei faamoemoe sa faafetaia ai foi le lagolago mai a le Struddys, World of Worthy ma le Grubbies i le faatupeina o tapenaga a le ‘au a le atunuu.
“E le ititi le agaga o le faafetai i le alolofa mai a nei foi Samaria Agalelei mo le ‘au a le atunuu e iai le lagona o le a taumafai lava le tatou ‘au i le malosi atoa e taaalo ai i lenei taamilosaga.
“E le faagaloina foi le lagolago a mātua ma aiga aemaise le tapuaiga a si o tatou atunuu i soo se tafa o le kelope o loo nofo tapuai auā se manuia o la latou ‘au o loo tauaveina le tagavai a le atunuu i taaloga faavaomalo.”
O le Aso Toonai nei lea e fuafua e taaalo ai le ‘au a Samoa ma le EMUs i le aso lona lua o lenei taamilosaga.
