O le Aso Gafua a sau e amata ai pesepesega o le 13 aso o le Kerisimasi ma o le a toe maimoaina ai faasalalauga tuusa’o o lea polokalame a le Ekalesia Faapotopotoga Kerisiano Samoa i Vaitele uta, ua lua tausaga ua na o polokalame ua tuanai sa maimoaina ona o tulaga sa faamalosia ai puipuiga o le tatou atunuu mai le faamai.
O le aufaipese a le vasega o alii ma tamaitai Malu o le Malo poo leoleo o le a tatalaina ia pesepesega, o se polokalame e mae’a i le tauafiafi o le aso a o lumanai le Kerisimasi.
Ua atoa i le tausaga nei le 25 tausaga o le 13 aso o pesepesega o le Kerisimasi o se polokalame na amata i le tausaga e 1997, e le faafeagaiga, le susuga Dr Faitala Talapusi a o galulue i le ekalesia EFKS i Vaitele uta.
O se polokalame o loo faaauau pea e oo mai i le taimi nei.
