Ua tapena nei nisi o alo o Samoa i le taaloga faipele le susuga Ato Plodzicki Faoagali ma Faustino Marion, ia la fusuaga muamua faapolofesa o le a faia i Samoa i le aso 29 o le masina fou o Novema, o le a fetaui ai ma ni alii fusu logologoa i totonu o Fiti, i le paga o le Cruiser Weight ma le Middle Weight.
O alo nei o Samoa na amata tausinio i faipelega a o talavou tausaga o le soifua ma ua silia nei i le tai 20 tausaga o le la matutua, o loo faaauau pea ona la tauave le fu’a o Samoa i taaloga faavaomalo e le gata i faipelega i le va o atunuu o le Pasefika ma Asia, ae faapea foi i taaloga Olimipeka ma taaloga a Malo o le Taupulega.
O Ato Faoagali o le a fetaui ma Apisa Naciqa o Fiti i le paga o le Cruiser Weight, ae o Faustino Marion o le a fetaui ma Raturakuso o Fiti i le paga o le Middle Weight.
O fusuaga faapolofesa a ia alo o le atunuu o le a avea ma fu’a taualuga o le taamilosaga faipele a le kalapu taalo a Malisi i Samoa ua faaigoaina o le Next General Judgement Day boxing tournament o le a tausinio ai ma au fusu mai Niu Sila ma Ausetalia.
