Ua sau le faatonuga mai le minisita o femalagaa’iga, ua tatau ona amata faaaogā igoa faaperetania o matagaluega a le malo ae lē o igoa Maori.

O le Waka Kotahi lea ua muamua iai, ma o lona uiga o le a toe foi lava i le NZTA poo le New Zealand Transport Agency.

O se tasi lea o maliega o le faigamalo fau faatasi lea ua ofi mai ai ma le New Zealand First, o le mautinoa e faamuamua le igoa peretania o le matagaluega seia vagana ai lava matagaluega e patino i tagata Maori.

Ripotia o lea ua amata aloaia lea suiga i saini a sui sinia o matagaluega e ala i imeli, ma o lea lava foi o loo faaauau faatalanoa isi pulega o loo i lalo uma o vaavaaiga a le malo.

O le NZTA o lea na suia i le 2019 lona igoa i le Waka Kotahi, faatasi ai ma le igoa i luga o lana logo.

I le fesiligia ai o le Palemia, Christopher Luxon i lea suiga, na ia tali manino o se tasi lea o suiga na fofola mai lava ia latou fuafuaga ma o le naunautaiga ia faafaigofie i tagata Niu Sila ona saili ma iloa matagaluega faapea faalapotopotoga a le malo.