O le valu masina na faasala ai i le falepuipui alii talavou e toalua o Lui Feseeta’i ma Talosaga Wales Amosa, ua faaitiitia i le 3 masina ina ua talia e le faamasinoga apili le la talosaga e ala ia la loia, sa finau ai ua maoa’e tele le valu masina o le faasalaga a le faamasinoga sili.
E aumai le faaiuga lenei ua tatala i laua i tua e faatali le faaiuga o le la apili ae ua mae’a ona tuli le lima masina o le faasalaga valu masina. O lona uiga ua magalo ma ua saoloto e le toe faaauauina le faasalaga.
O i laua ia sa mafua ona molia ona o se gaioiga sa aafia ai ma nisi sa faafaigaluega i le Sportslotto. O le isi vaega o le la talosaga sa lu’i ai le faaiuga i le lē faatāua o le la toe totogiina o seleni na aafia ia la solitulafono.
Ua faaalia i le faaiuga a le faamasinoga apili, e sa’o le faaiuga na faia e le faamasinoga sili ona o tagata na aafia a latou seleni ia latou pepa na faatau i le Sportslotto ma tuuaia ai nisi o le aufaigaluega na molia e aofia ai Lui ma Talosaga, e telē se aafiaga ona o a latou pepa poo ticket na faatau e lei faaaogaina.
