Ua malilie nei Isaraelu ma le Hamas i se maliega o le a taofia ai mo le taimi nei fetauiga i Gaza ma oo atu ai i le faasa’olotoina o tagata na ave faapagota i le taimi o tauave e lē gata i tagata Isaraelu ae faapea foi Palesitina.
O le faataunuuina o lea maliega o le a amata i le Aso Sa e pei ona saunoa ai le Palemia o Qatar i le CNN.
Ua fuafua o le a faasa’oloto ai e le Hamas le 33 o tagata ua taofia faapagota, o le vaega muamua lea o le maliega.
E faitau selau foi pagota Palesitina ua fuafua o le a faasa’oloto ai i le taimi lea mai le falepuipui i Isaraelu ae ua faailoa foi i le lipoti e tatau pea ona ioeina mai lea tulaga e le Kapeneta a Isaraelu.
O le Peresetene o Amerika, Joe Biden na ia faailoa o talanoaga o le a faaauau pea e tusa pe taofia fetauiga.
O le vaega lua o le maliega o fetuuna’iga ia mo le faamuta loa o le taua i le va o itu e lua.
Ua talia lelei foi e le UNICEF lea maliega ma ua faailoa o le a faavave loa ana gaioiga aemaise lava i fesoasoani mo nofoaga ua matuā faaleagaina i le taua.
Fai mai a latou ua leva ona tatau ona faia lea faatatau mo aiga ma tamaiti i Gaza ua silia ma le tausaga o feagai ma mafatiaga aemaise i latou o loo ave faapagota.
Ua ta’ua e le UNICEF o le taua i Gaza na aupito sili ona aafia ai tamaiti, a itiiti mai pe 14,500 ua maliliu ma le isi aofa’iga pe 17,000 ua motusia le mafutaga ma mātua.
Ua valaau foi lea faalapotopotoga ina ia utagia aiaiga o lea maliega ma faataga latou e faatino le latou auaunaga i le togafitia o tamaiti ua aafia i le fia aai, faapea le faia o tuipuipui e puipui ai mai faama’i e pei o le polio, misela ma le cholera.
Puna o Faamatalaga: https://edition.cnn.com/world/live-news/israel-hamas-gaza-ceasefire-hostages-01-15-24/index.html
