E maualuga le tulaga o le taligāmalo a Samoa mo le fonotaga a le CHOGM e pei ona iloa i faamatalaga ma saunoaga a le to’atele o sui auai i le aso ananafi, le ulua’i aso o le faamoemoe o le CHOGM i Samoa.

Na faaleo ai e nisi o sui mai atunuu na malaga atu le lagona e faapei o loo i o latou lava atunuu ina ua taunuu atu i laufanua o Samoa ma maitauina ai le matagofie o le teuteuina aemaise o le laufofoga fiafia o tagata ma le faapipiina o fu’a o o latou atunuu i afio’aga eseese i Samoa.

O faatalanoaga i le aso ananafi na mātele i mataupu e taula’i i le itupa o tamaitai, talavou ma tagata.

E 56 atunuu o le lalolagi o loo iai o latou sui i lenei faatasiga ma o le Palemia o le atunuu, Afioga Fiame Dr Naomi Mataafa na saunoa i le tatalaina o fonotaga laiti na amata ai le polokalame ma ia ta’ua ai o le fonotaga lenei a le CHOGM e faatatau i le tuuina o kulupu ma’ale’ale i le pito i luma ma e faatatau i faatalanoaga eseese ma le tāua o sootaga o le aiga o le Commonwealth.

O le tamaitai talavou o Brianna Fruean se tasi sa aofia i le panel na faatalanoa i le mataupu o le sao o tupulaga talavou i suiga o le tau ma le finau mo avanoa e mafai ai ona faaleo lagona auā le lumana’i manuia o atunuu.

O le galuega faatusitala le isi auaunaga e tāua tele i lenei feiloa’iga, faapupula ai e se tasi ua loa i le galuega i le Pasefika mai le atunuu o Tonga, Kalafi Moala e tāua le maua o faamatalaga sa’o ma le tonu, peitai e tāua foi le vave ona kiliva ma maua e tagata e fuafua iai faai’uga fai aemaise lava i tulaga o le tau ma le saogalemu o tagata.

O le asō o loo faaauau ai le aso lona lua o ia fonotaga.