Search
Search
Photo by Government of Samoa

Sainia le Maliega o le Poloketi $1 miliona a le Itumalo Sagaga 3

Ua mae’a faatautaia le sainigalima a le Malo o Samoa e tauala atu i le Matagaluega o Tina ma Tamaitai Atina’e o Afioaga ma Aga Fesootai ma sui o le Fono Faavae a le itumalo e ala lea i le poloketi o le $1 miliona lea o loo faagasolo nei i itumalo i le atunuu.

Saunoa ai le Minisita o loo nafa ma lenei poloketi, Afioga Mulipola Anarosa Molioo e tusa ai o lenei faamoemoe.

“Mo le silafia, o Sagaga 3, o le isi lea o Itumalo ua savali i le 9 masina talu ona to’alia ona o mataupu faalotoifale aemaise foi le va o le afioaga o Leauvaa ma Aleisa.

“Sa tele aso, vaiaso ma masina sa taumafai atu ai le matagaluega ina ia foia le faafitauli sa tulai mai.”

Ta’ua e Mulipola o le masina o Iulai sa faatinoina ai se fonotaga ma le feiloaiga a le Itumalo ma le Matagaluega e soalaupule ai mataupu uma e faatatau i le poloketi.

“O lenei fonotaga sa tau fai laulau sasaa ai finagalo o le Itumalo ma auala atu ai foi se tuualalo a le matagaluega ma le komiti faafoe o atina’e a itumalo.

“O le agaga o le faafetai, ona e ui i le lukaluka o le tai i finagalo o le Itumalo i le fonotaga ae sa mau pea le toovae ma tua i le oo.

“Sa talisapaia e le Itumalo se fautuaga ma e momoli atu le agaga faafetai ona o le amanaia o se tuualalo a le Komiti Faafoe e tauala mai i le Matagaluega.

“Ua tasi ai le faafitiga o Aleaga ma tasi moemoe le afioaga o Leauvaa ma Aleisa e talia se faaoloolo maau a le Komiti Faafoe ma le matagaluega.

“Ua moni ai le upu a le atunuu, e lē po pea se nuu ae sau taeao malama e susulu ai le finagalo amiotonu a le Atua ma avea o se moemoe fou e tupu ma ola ma maua ai le filemu.”

E ui ina tele faafitauli e pei ona saunoa ai le Minisita na ia toe faamalosiau ai i sui o le itumalo, “Aua ne’i galo, ua na o se amataga ae faamoemoe le see o le vaa i le galulue faatasi o le Taitaifono ma le Fono Faavae a le Itumalo e unai faatasi auā se manuia o le Itumalo.

“E leai se faiva e asa ma se ma’imau, ae o le matou tatalo ia maua pea e lau Afioga le Taitaifono ma lou auvaa le loto tetele, ma le onosai e faafoefoe ai lenei poloketi tāua a le tatou Malo ina ne’i aua ne’i vale tuulima.”

I faamatalaga mai le Matagaluega o Tina ma Tamaitai ina ua mae’a le iloiloina o lipoti a suetusi i le $200,000 sa faaaogāina e fausia ai le Ofisa o le Fono Faavae a le itumalo ma mae’a pasia ai e le komiti faafoe lenei lipoti na agavaa ai loa le itumalo Sagaga 3 mo le sainia ai o le maliega auā le faamatuuina atu o vaega o le $1miliona auā ana atina’e.

E $150,000 ua faamatuu mo le faagaioina o le Ofisa a le Fono Faavae a le itumalo e aofia ai totogi o le aufaigaluega galulue ma alauni o sui o le komiti o le Fono Faavae.

O isi vaega tupe e $850,000 ua fuafuaina mo poloketi o atina’e a le Itumalo ma ua mae’a ona maioio vaega uma i le faamatuuina o lenei seleni i vaega ua mae’a folasia e le Matagaluega ina ia manino ma malamalama ai vaega uma o le poloketi.

Tala sili ona faitaulia

TALA FOU MAI SAMOA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required