Ua faailoa e le Minisita o Vaalele savili o loo iai foi le vaaia o le pulega o malaevaalele le tofa Olo Afoa Fiti Vaai, ua mae’a ona sainia se maliega ma le kamupani vaalele o le Emirates i le atunuu Arapi o Dubai ua talosaga mai ai i se faatagana e lele mai ai ona vaalele i Samoa.

O loo faatali foi se feiloaiga a le Minisita ma sui o le kamupani vaalele a le atunuu o Singapore e afea ai foi lo tatou atunuu, aemaise o se talosaga faapea mai nisi o atunuu o le Pasefika o loo iai a latou kamupani vaalele.

Ua faaalia e le Minisita o se avanoa lelei lea e maua ai avanoa mo tagata tafafao mai isi vaega o le lalolagi e asiasi mai i Samoa ma siitia ai ma le atiina a’e o tagata tafafao.

O kamupani vaalele o loo tautuaina nei malaga agai mai i Samoa faapea mo pasese e tuua le atunuu o le Air New Zealand ua faamautu mai le toe faaopoopo o ana malaga agai mai i Samoa i le faaiuga o le masina fou o Oketopa.

Le afioga i le Minisita o Vaalele sivili o loo iai ma le vaaia o le pulega o malaevaalele le tofa Olo Afoa Fiti Vaai i sona finagalo i le polokalame o le Soalepule a le TV2.