Ua sainia nei se maliega a Niu Sila ma le Iuni a Europa e faatatau i fefaatauaiga saoloto, free trade agreement.
Sa iai le Palemia o Niu Sila, Chris Hipkins i Brussels mo lea faamoemoe ma faamautu ai ma se maliega o le a aveesea ai le 91 pasene o le totogi o le tiute i oloa a Niu Sila lea e fuafuaina pe ā ma le $1.8 piliona le tupe e faaalu i le tausaga e i latou e auina atu oloa i fafo mai Niu Sila nei.
E ui i le tele o le taulaiga sa iai i tulaga o penefiti tau tupe ma le aogā o le maliega ae o le a faailoga ai foi ma le faamalosia o sootaga i le va o itu e lua.
Lipotia e le One News le saunoaga a le Peresetene o le Iuni a Europa o Ursula von der Leyen ua ia faailoa ai o atunuu e 31 o sui o le Iuni o loo saili e faailoa le tutufaatasi i le tele o mataupu e aofia ai ma le faaaofia ane o Suetena poo Sweden i le sootaga.
O le faamatalaga a Hipkins i le mataupu lea na ia ta’ua ai o Niu Sila o se atunuu o loo saili ia iai ni ona sootaga lelei ma loloto ma lautele foi ona fesootaiga i le lalolagi atoa.
