O le alii talavou Samoa mai Aukilani i Saute, o Teo Glacier ua saini nei ma se tasi o kamupani puepese iloga i le lalolagi, le Capitol Records, o se ausiaga iloga mo se alii talavou o lea e lei uma ana a’oa’oga maualuga poo le high school.
O le alii o Teo Glacier poo lona igoa i lona pepafanau o Eden Betham, o loo faauma nei lona tausaga mulimuli i le Papatoetoe High School, ae o le tausaga e 2020 i le taimi o le vavao mai le faama’i Koviti-19 na amata ai ona faataitai le fiafia i musika.
Ae o se manatu mai tagata ua iloga foi tomai i lenei taleni o le musika, o le saini o Teo i le Capitol Records, ua na o se laasaga amata lea mo nisi mea tetele ua ataata mai le oo atu i ai o lenei alii talenia i le musika.
O Teo ua sefuluvalu ona tausaga, ma o ona tupuaga e mai afioaga i Samoa o Faleasi’u, Tanugamanono, Aleisa ma Salelologa.
Na amata lauiloa mai lenei alii talavou ina ua amata ona toatele tagata ua mulimuli ma fiafia i nisi o ana pese, o ana lava fatuga sa amata ona ia tuu i luga o fesootaiga televavave i le tik tok, ma oo ai lava ina lauiloa i le lalolagi atoa.
E lei faatalitalia e Teo lenei laasaga maualuga ua oo i ai lana taleni, e ui sa iai lona faanaunauga e fia saini i se kamupani puepese ae na te lei mafaufauina o le kamupani iloga lenei a le Capitol Records.
O le Capitol Records o se kapuani puepese na pue ai pese a nisi o igoa iloga o le musika i le lalolagi e pei o Nat King Cole, le ABBA, Babyface, Katy Perry, Ice Spice, Lewis Capaldi, Masego ma Queen Naija ma isi.
I se faatalanoaga a Teo i luga o le Niu FM, sa ia faamatala ai le amataga uma o lana taleni, lea na ia ta’ua ai o si ona uso matua lea ua malaga e nofo i Ausetalia, o ia lena na mafua ai ona ia naunau i le musika.
O le vaitaimi o taofia aoga ma galuega ona o le faama’i, na alu ane ai lona uso i lona potu i se tasi aso, tuu ane e lona uso lana laptop ia te ia ma fai ane, e faataitai ona fai ai ni ana musika.
O se tasi o pese lata mai nei a Teo, o le Close with Desires ma e sili atu i le 2.5miliona taimi na ta ta ai lena pese i luga o le Tik Tok, ma o lana pese muamua lena lea na amata ai le latou deal ma le Capitol Records.
