I galuega faaiu o lenei tausaga a le faamasinoga o talosaga apili a le faamasinoga maualuga lea o loo faagasolo i lenei vaiaso, ua lē tagofia le talosaga apili a Lema’i Faioso Sione o loo tuli lona faasalaga faafalepuipui i le moliaga o le taupulepule e faaoo le maliu, ona ua leai se loia e tauaveina lana talosaga.
Ua mafua lea tulaga ona ua faamavae le tamaitai loia le susuga Unasa Iuni Sapolu sa finauina le moliaga o Lema’i i le faamasinoga maualuga.
Ua faataatia ai lea mataupu mo le tauaofiaga amata a lea faamasinoga i le tausaga fou se’i maua se loia e tauaveina le apili a le itu talosaga.
E iai ma le isi mataupu ua faapena ona taatia i le tausaga fou, ona ua leai se loia e tauaveina.
Ua totoe ai nei na o talosaga apili e lima o loo tagofia e le faamasinoga o talosaga le court of appeal.
