Ua toe maua oloa tau taumafa manaomia i aso uma sa faaitiitia pe sioki i lo tatou atunuu, e mafua i le tuai taunuu o vaa la’uoloa.
O se faaletonu ua matauina e nisi ua fai ma tupu pea, ma tele ai fesili pe aisea?
Ua faailoa e le Minisita o Tupe i se feiloaiga talu ai nei ma le vasega o tusitala, e lē o le Malo le mafuaaga ae o le va o kamupani e okaina oloa ma kamupani vaa.
Peitai o le finagalo o le Minisita o Galuega tetele le tofa Olo Afoa Fiti Vaai, i le polokalame talu ai o le Soalepule na ia faailoa ai se sailiiliga o le a suesue ai pe iai se isi mafuaaga e ese mai le tuai o vaa la’uoloa e mafua ai ona alu alu sioki ma faaitiitia oloa tau taumafa masani e pei o vaemoa, aniani, ma suka.
Faaalia e Olo i lea faatalanoaga i le TV2 e iai masalosaloga ua laumanu’ia ai ni gaioiga o loo faia e nisi faleoloa supa maketi o loo faagaioia e tagata Asia, o le taunuu o le vaa oloa ma se uta o pusa moa mo kamupani tetele siiatoa poo wholesale a Frankies ma Ah Liki, ona agai lea o faleoloa tetele ia ma faatau uma ia oloa ma ave teu.
E foliga ai o se taumafaiga e taofiofi ai le maua pea o ia oloa manaomia e tagata, ma toso ai le taimi ina ia alu alu amata loa ona faapea ua faaitiitia, ae avanoa ai loa ona sii maualuga le tau ma faaopoopoina ai tupe maua a ia pisinisi.
Talu mai ona mae’a le palota tele i le tausaga e 2021 na amata molimauina ai le faaitiitia o oloa manaomia aemaise le pusamoa ma le aniani i nisi taimi.
Sa tuuaia ai e nisi le faigamalo fou i le faaletonu o a latou pulega tau amata, i le fai ma sioaki ia oloa mai fafo.
Peitai o lea ua faamanino le vala lea e le minisita o tupe le afioga Lautimuia Uelese Vaai, e lē o se tiute o se Malo le okaina o oloa mai fafo, o le tiute lea o pisinisi ma kamupani o loo faatauina atu oloa tau taumafa i le atunuu.
O le sailiiliga ua faailoa e le Minisita o galuega tetele e saili ai nisi gaioiga e mafua ai ona sioki oloa mai fafo e ese mai le tuai o vaa la’uoloa, o se tasi lea o gaioiga tāua o le a tatou iloa ai nisi metotia faapisinisi tatou te lē o iloa ae o ni auala e saga faateleina ai a latou polofiti poo tupe mamā.
