Ua faatonuina e le Fofoga Fetalai o le Palemene le susuga Papalii Li’o Oloipola Ta’eu Masipa’u, se suesuega faalotoifale a le aufaigaluega a le ofisa o le fono o loo feagai ma le faasalalauina o taualumaga a le Palemene i luga o upega tafailagi.
Faaalia e le Fofoga Fetalai o se sailiiliga o le a iloa ai mafuaaga o le motusia o ia faasalalauga i nisi taimi, a o faagasolo taualumaga a le fono usu a le atunuu.
O le Aso Lua o le vaiaso nei ina ua toe tauaofia le fono aoao, a o faagasolo taualumaga i le lipoti a le komiti o tulaga aloaia ma amio taualoa lea na folasia ai le fautuaga a le komiti e faamalolo le tumau mo le 24 masina sui faipule o le itumalo palota o Lepa ma le itumalo palota o Faleata 3, na motusia ai faasalalauga i luga o le api o foliga, ae sa lelei lava faasalalauga i le alaleo faasalalau o le leitio o le 2AP.
O le api o foliga le facebook o loo maua ai e le toatele o tagata Samoa o aumau ma alala i atunuu i fafo taualumaga a le fono aoao faitulafono.
Faaalia e le Fofoga Fetalai ina ua maua iai se fesootaiga i le telefoni, ua tupu soo lea faaletonu ma e tatau ona matua saili lelei poo fea e mafua mai ai, ae pe o iai foi nisi o i tua i le faatupuina o lea faaletonu.
Na malolo le fono aoao i itula fono o le taeao i le Aso Lua, ma faia ai sailiiga i le faaletonu na tulai mai. Faaalia e le susuga Papalii Li’o Oloipola Ta’eu Masipa’u, na logoina o ia e le aufaigaluega a le fono, latou te leiloa le mafuaaga o le motusia o faasalalauga i luga o upega tafailagi.
