O lea ua sailia nei le lagolago a tagata Samoa e faaaogā ai se palota i luga o fesootaiga televavave, i se taumafaiga o loo tapena e nisi o loo finauina le latou mau, ia taofia loa le taua i Sasae Tutotonu e pei ona sii taua Isaraelu i tagata Palesitina.
Ua faailoa i lea taumafaiga o le autu o le mau o loo fia momoli o le vaai alofa i ola ma soifua ua fano aemaise le toatele o fanauiti a Palesitina ua ma’umau ai ola.
O le Samoans for ceasefire ua faaigoa ai lea talaiga o loo sailia ai le lagolago mo le taofia o lea taua, ma ua faaoo foi lenei taumafaiga i lo tatou Malo.
Mo le silafia e lei palota Samoa i le sailiga o se lagolago a atunuu o loo avea ma sui o Malo Aufaatasi ina ua taunuu le fono a Malo Aufaatasi talu ai nei, e saili se finagalo o atunuu pe latou te lagolagoina le taofia o le taua.
Talu mai le aso 10 o le masina nei o Novema ua faailoa i lipoti a Malo Aufaatasi ua 11,078 tagata Palesitina ua fasiotia i le taua i le tuanai o le osofaiga fai faamalosi a le vaega faatupu faalavelave a Palesitina le Hamas, lea ua fano ai soifua o tagata Isaraelu, ma ave faamalosia nisi o lea atunuu ma o loo taofia faapagota pea i le taimi nei e lea vaega faatupu faalavelave.
Ua faailoa foi i lea lipoti a Malo Aufaatasi ua tusa ma le tasi le miliona 5 selau afe tagata Palesitina i totonu o le nofoaga o le Gaza strip ua leai ni fale e nonofo ai talu mai ona tu’i pomu e vaalele tau a Isaraelu lea nofoaga o tagata Palesitina.
O le naunautaiga o i latou o loo galulue mo le sailia o le lagolago mo le taofia o le taua i le nuu paia, ia taulamua le Malo o Samoa i le lagolagoina o lenei taumafaiga, ma saili atu foi le lagolago i ana paaga totino o isi atunuu o le Pasefika.
