O le Aso Tofi lenei ua faagasolo ai i Salelologa i Savai’i se fa’atalatalanoaga e faamanino ai le fuafuaga a le malo e tauala mai i le faalapotopotoga o le faaputugatupe o le lumanai manuia o tagata e teuteu le tulafono a lea faalapotopopotoga i le fuafuaga e faatino se faamanuiaga tau penefiti mo le soifua mālōlōina o fanau.

O loo lagolagoina e le Matagaluega o Aiga ma Agafesootai lea tapenaga a’o feagai lea matagaluega a le malo i le taimi nei, ma le galuega o le resitalaina o fanau pepe mo le maua o seleni e o latou matua ma e o va’aia auā le tausia lelei ma maua le ola soifua mālōlōina a’o tuputupu a’e.

O faatalanoaga i Savai’i ma Upolu o le a avanoa ai ona fesiligia e le atunu’u tapenaga o lea fuafuaga a le malo e ala mai i le NPF.

Mo le silafia o le paea’iga talu ai a le palemene sa amata faatalanoa ai foi e lea faalapotopotoga tuma’oti a le malo le fuafuaga o se inisiua tau soifua mālōlōina ma ua mae’a ona tu’uina atu i le faigamalo sa tula’i i le paea’iga 17 a le palemene le ripoti o ia fa’atalanoaga ae e lei fa’atinoina.