O loo faia nei sailiga ma suesuega a leoleo i le fia maua o le taavale na aafia ai le soifua o se tamaitai Saina.

O lea faalavelave tau taavale sa tulai mai i le auala o Vaitele Street e lata i le pamu penisini i Vailoa Faleata.

O le lē maua o le taavale ua saili atu ai e leoleo ni faamatalaga mai le atunuu e tau saili ai le taavale e faapea o le ituaiga o le Hyundai Getz lanu pa’epa’e.

O loo manaomia foi le fesoasoani a le atunuu i se faamatalaga e saili ai lē na faafoeina lea taavale.

Faaalia e leoleo e lei oo atu le avetaavale e faailoa atu le faalavelave na tupu. 

I se isi o tala mai lea matagaluega, ua toe maua foi nisi aisa ma laau faasāina o le maruana faapea ni tupe i se osofaiga poo se raid a leoleo, na faatino i le nofoaga o loo iai se pisinisi o se car rental a le Tafa’ifoe i Moataa.

E 10 afe se tinoitupe na maua ai, ma e toaono ua taofia ai mo suesuega.

O le vaiaso foi na tea nei na osofai ai e leoleo se fale o se aiga i Puipaa ma maua ai foi aisa, o ututau ma se tinoitupe e 23 afe tala. E toasefulutasi tagata ua taofia foi mo suesuega e aofia ai se tamaitai.