O loo iai popolega o pasese femalagaa’i i le asō i le malaevaalele i Melepone mo ni fetuunaiga ia latou faigamalaga ona o le solo tetee ua faia nei i le malaevaalele a tagata faigaluega latou te utuina vaalele (refuelling workers) lea ua faia le latou solo tetee mo le 24 itula. 

O le ta o le fa i le vaveao analeila na savavali ese ai i latou ia mai a latou galuega a o sailia ai se latou fonotaga ma le kamupani vaalele o loo faafaigaluegaina i latou le Rivet ma e mafua foi le tetee ona o tulaga o totogi ma le faatinoga o galuega.

Fai mai le Qantas o le solo tetee lea o le a leai sona aafiaga i tagata femalagaa’i ma faailoa foi e leai se mafuaaga o le a suia ai fua a latou fuafuaga i malaevaalele e tatau ona agai iai.

Na saunoa le failautusi o le Transport Workers Union o Michael Kaine ua faia lea tetee i le mae’a o se taimi umi o fetuunaiga e leai lava ni fua lelei aemaise lava i mataupu o totogi ma le tulaga o loo faatino ai galuega, e lei toe iai foi se siitaga o totogi i totonu o le tolu tausaga.