Search
Search
Ua ave le fautuaga ma le lapataiga a le Fofoga Fetalai i sui Faipule o le Palemene, ua ia faailoa ai lona aapa i faasalaga, pe a lē usitai i aiaiga o tulafono tumau o loo faafoe ai taualumaga o le fono

Poo ai se Faipule o le a palasi iai le samala pe a toe talanoa lipoti a komiti?

O le tutulai o nisi o sui faipule ma tuusa’o lona finagalo i se isi faipule e aunoa ma le faatagana a le Fofoga Fetalai, o se isi lea amioga o loo matauina pea i taimi o fonotaga a le Palemene a le atunuu.

O le afea foi e saunoaga a nisi sui Faipule o ni mataupu e lē o agai iai ni felafolafoa’iga e pei o lipoti a komiti faapalemene na amata faatalanoa i le vaiaso ua mavae, o se isi lea fautuaga a le Fofoga Fetalai o le a feiloai ai se Faipule ma aulape o faasalaga o tulafono tumau o loo pulea ai taualumaga a le fono aoao faitulafono.

E lē o se taimi muamua lea ua aliali mai ai le solifono o nisi o faipule auā o paeaiga ua tuanai sa aliali mai ai foi ia amioga.

I le tau faai’ui’u o galuega a le fono i le vaiaso na tea nei na ave ai le lapataiga ma fautuaga a le nofoa poo le afioga i le Fofoga Fetalai, susuga Papalii Li’o Oloipola Ta’eu Masipa’u i sui mamalu uma, ma faailoa iai o le a ia faaaogā faasalaga ua aiaia pe a lē toe usitai Faipule, aemaise lava o le tulai o se sui ma saunoa ae e lei finagalo iai le Fofoga Fetalai.

O taualumaga a le fono i le vaiaso ua mavae sa tulai mai ai se feteenaiga o finagalo o le taitai o le Itu Agai, le sui Faipule o Faleata 3 ma le Minisita o Fesootaiga le afioga Toelupe Poumulinuku Onesemo a o talanoaina le lipoti a le komiti faapalemene mo le matagaluega o fesootaiga ma faamatalaga faatekonolosi, lea sa tulai ai ma le Minisita o Faatoaga ma Faigafaiva e fesoasoani i le minisita o fesootaiga e faamanino se vala na lāgā e le taitai o le Itu Agai e faasino i laina o fesootaiga ma le totogi o le initaneti.

Na aliali ai ma se feteenaiga o finagalo i le va o le Faipule o Faleata 3 le tofa Lealailepule Rimoni Aiafi ma le Minisita o Faatoaga ma Faigafaiva le susuga Laauli Leuatea Polataivao Fosi Schmidt. 

Na felauai ai sui mamalu ma tulai ai le minisita o le soifua maloloina ma faatū le lafo e faamalolo ai le Faipule o Faleata 3 mai taualumaga a le fono.

Na tulai le Palemia ma ave lana tuualalo ia toafilemu le fono ma sa mafua ai ona toe faaui i tua le lafo.

O taualumaga foi a le Palemene i le vaiaso ua mavae na afea ai e le taitai o le Itu Agai le mataupu i le 400 eka o eleele ua talanoaina e le Senate a Amerika Samoa ma ta’ua ai se fuafuaga a le Malo o Samoa  e lisi atu i le faigamalo a Amerika Samoa e faatino ai se atinae lafumanu a le teritori.

O se mataupu e lei lavea i le lipoti a le Matagaluega o Puna’oa Faalenatura ma Siosiomaga sa saunoa iai le taitai o le Itu Agai, ae sa tali iai le Palemia ma ia faailoa o se mataupu na te lē o silafia.

O le mafuaaga lea o le toe faamanatu a le Fofoga Fetalai i Faipule ina ia saunoa sa’o i mataupu o lipoti ae lē o nisi mataupu e ese mai ai, ona e toso ai le isi lavelave e lē o le autu lea o agai iai felafolafoaiga.

O le Aso Lua o lenei vaiaso e toe tauaofia ai le Palemene e talanoa lava lipoti a komiti, ma o le a tatou mataitu poo ai o le a muamua faasala i le faamalolo ma taualumaga a le fono aoao.

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required