Ua toe ola foi le miti a le lanumoana mo le siamupini o le Origin i lenei tausaga ina ua ia faatoilaloina le Maroon i le po anapo i le taaloga mataina i Melepone.
E toatele sa manatu o le a maua ai anapo le iuga o le Origin 2024 pe a toe malo foi Kuiniselani ia Niu Sa Uelese peitai na toe faasa’o ai e le lanumoana le tele o ana mea sese mai le uluai taaloga ma malo ai i ‘ai e 38-18.
O lona uiga la o le taaloga faaiu i le aso 17 o Iulai i le Suncorp Stadium o le a iloa ai le tonu sa’o.
E ui la o le taaloga e faia i Kuiniselani ma e lē taumate o le a matuai toatele ma faatumulia le malae i le latou autapuai pe a faatusa i se vaega toaitiiti mai Niu Sa Uelese ae fai mai se tasi toeaina matua o le autapuai a Niu Sa Uelese i talafou, o le taaloga lea e sa’o ai se isi fuaitau a le atunuu, pe itiiti le autapuai e lē afaina auā e itiiti ae ma’ini.
