O loo ua tuuina nei le avanoa i alo ma fanau ale atunuu e fia auai ile aoaoga e aofia ai le ailao afi, o faafiafiaga ale Pasefika ma le faia lea o se laei (creative wear).
O se tasi lenei o vaega e mamafa ai le tomai male agavaa ole tausala o Samoa ia Moemoana Safaatoa Schwenke o nisi o measina e iloga ai Samoa ma le Pasefika i le lalolagi.
O lenei faamoemoe e pei ona faalauiloa ai i upega tafailagi, o se auala e mafai ai ona faasoa le tomai o le tausala o Samoa i agavaa oloo talenia ai.
O Schwenke ao lei pale mai ile tausala o Samoa ile tausaga nei, o se tasi o faiaoga i le aoga oloo faafoe e ona tuaa i Ausetalia ua taua ole Matavai Pacific Cultural Arts oloo toatele nisi o alo ole Pasefika oloo auai ai, o se tasi foi o tamaitai ailao afi ma le itu o faafiafiaga.
O lona tomai foi ma agavaa ua ia maua oloo molimauina i nisi o tauvaga ailao afi i Hawaii ma nisi o faamoemoe na auai ile Pasefika ma Samoa nei.
O lenei faamoemoe e agavaa ai fanau mai le 6tausaga ile 12 tausaga mo alii male 13tausaga ile 21tausaga mo tamaitai ma e faapitoa mo fanau ile atunuu.
E leai se totogi e auai ai i lenei aoaoga ma oloo mafai ona faatautaia ile fesoasoani a le Onomea Production, Matavai, Pulega o Tagata Tafafao Maimoa mai Fafo, Digicel, Siva Afi Samoa male Urban Sound oloo faipaaga ai lenei faamoemoe.
