Ua sa’i le finagalo o le faamasinoga i se faaiuga i se mataupu tau aitalafu poo se nonogatupe na faia i le faletupe o le ANZ i Samoa, ona o mafatiaga ogaoga ma matuitui na feagai ma se ulugalii o le la fasi fanua e kuata eka, na faamaonia ai le nonogatupe a lo la atalii ma lona toalua.

O Suluape ma Aiga Emosi, e pei ona faaalia i le faaiuga tusitusia o se ulugalii lima vaivai ma e lei oo foi le maualuga o lo la soifua aoaoina i ni aoga maualuluga, ona sa gata i le aoga tulagalua.

O le tausaga e 2013 na aveesea faamalosi ai le ulugalii ma lo latou aiga ma lo latou fanua, ina ua ave e le faletupe le mataupu i le faamasinoga ona ua faaletonu le toe totogiina o le aitalafu a le atalii o Suluape ma Aiga na faaaoga ai le pepa o le fanua.

Na ioe le tama i le aioi a le atalii e avatu le fanua e faamaonia ai lana aitalafu e 20 afe e faatau ai se taavale laititi laupasese, ae i faamaumauga a le faamasinoga, e lei malie le tina e ave le fanua.

O le ulugalii o la’ua uma o loo faamauina o pule o le eleele kuata eka o se fanua umia saoloto poo se freehold land.

Na alualu le totogiina o le aitalafu a le atalii, e lei mae’a ae toe faia isi nonogatupe faaopoopo ma oo ai i le 54 afe tala le aofaiga o le aitalafu i le faletupe.

O i na oo ai le ulugalii i le faletupe mo se gaioiga fesoasoani ona o le a malaga i fafo lo la alo ma lona toalua, ae ua faaletonu le toe faaolaina o le nonogatupe.

Na tulai mai ai le faaletonu ina ua le gafatia e le ulugalii togitogi le aitalafu, ma ave ai e le faletupe le mataupu i le faamasinoga ma aumai ai le poloaiga e faatulai ese le aiga.

Na mumusu le ulugalii ae na faaaoga le malosi o le Tulafono e le faetupe i le ave o leoleo e aveese faamalosi ai.

I le 84 tausaga o le soifua o Suluape Emosi na maliu ai, ma ua faaalia le faanoanoaga o le faamasinoga i le tulaga na oo iai ona sa tau saili se fanua e teu ai le tamā, ma lagomau ai i le aiga o se tasi o ona uso.

O le tina mafatia na faamautu i se tasi o ona aiga i Sogi ma aafia i ni mafatiaga ogaoga ma tuga o le mafaufau ona o le mea na tupu i lo latou fanua.

I le silasila a le faamasinoga e iai vaega o le Tulafono sa solia e le faletupe i le faatinoina o lana gaioiga ma le faia o le nonogatupe, e le o se aitalafu na faia e le ulugalii.

Ua talia ai e le faamasinoga le su a le ulugalii sa finauina e le tamaitai loia o Ruby Drake ma faatonuina ai le faletupe e totogi atu le aofaiga tuufaatasi o se vaegatupe e $626,112.72 sene i le itu tagi poo le ulugalii.

O lea tupe e silia i le ‘afa miliona tala o le taui lea o mafatiaga, o le tino ma le mafaufau aemaise mafatiaga ogaoga na aafia ai le ulugalii ona o le faatamala o le faletupe i lo latou faatau o le fanua e toe faaola ai a latou seleni na nono.

Na faatau i le 130 afe, faaola seleni a le faletupe o le ANZ, ona totoe ai lea o le 72 afe ma ona tupu, peitai na taofiofi e le faletupe lea seleni. 

O le tausaga e 1984 na faatau ai le fasi fanua kuata eka o le ulugalii ma le la fanau i Siusega ina ua maua se seleni i se manumalo o le taaloga o le lulu.

Na muai faia ai se nonogatupe e fausia ai lo latou fale ma o se tasi o le fanau na vaaia le togitogiina o le aitalafu muamua lea.

O le tamā o le aiga sa galue o se kamuta ma o le amataga lea o se olaga fou mo ia ina ua mautu le fasi fanua ma faamautu ai seia oo ina tulai mai faaletonu mulimuli ane ma ave ai le faletupe lo latou fanua.

O le faamasinoga lenei sa suesueina ma faia le faaiuga i le amataga o le masina nei o Mati, e le afioga i le faamasino o le faamasinoga maualuga ua avea nei ma Pelesetene o le Faamasinoga o Fanua ma Suafa, le afioga Lesatele Rapi Vaai.