Faatumulia Western Springs i Aukilani i le faaiuga o le vaiaso i le faitau afe na auai ai i le Pasifika Festival
E 5 tausaga talu ona taofia le festival tele lenei i Aukilani ma o le faaiuga o le vaiaso lea faatoa toe faatasitasi ai e le gata o faaaliga a atunuu e 11, ae o le silia ma le selau o faleaiga, faleofu ma le tele o pisinisi a tagata Pasefika.
O le toatele foi na asia Western Springs i le Aso Toonai ma le Aso Sa na faafiafiaina i le tele o faafiafiaga faaleaganuu ma o lea foi na auai ai le alii Palemia Chris Hipkins, le Sui palemia Carmel Sepuloni ma nisi o sui Pasefika a le Labour.
Na saunoa le Palemia o le itu e aupito sili ona fiafia iai o le omai faatasi o tagata ma fiafia faatasi ma aiga aemaise o aganuu eseese.
Ae na saunoa le uluai Sui palemia o Niu Sila o ia o se tagatanuu Pasefika le tamaitai o Carmel Sepuloni, o le Pasifika Festival ma le Polyfest o faaaliga tetele ia e lua mai le tusa ma le 19 o faaaliga i totonu o Niu Sila, ma o nei faaaliga o loo iai le lagolago a le malo.
