Ua poloaiina le taitai ma le sui taitai o le Itu Agai ina ia tuuina atu faamaoniga o a laua saunoaga na faia i le Palemene e faapea o le Minisita o Galuega Tetele ia Olo Afoa Fiti Vaai o se tasi o loo iai ona sea i le Kamupani e gaosia le eletise i le malosiaga mai le la le Green Power.
O le lafo na faatulai e le minisita o Galuega tetele ia Olo Afoa Fiti Vaai ma na faaluaina e le alii Minisita o Faatoaga ma Faigafaiva ia Laaulialemalietoa Leuatea Schmidt.
O le tāpā ai o faamaoniga o faamatalaga na faia na mafua ina ua tali fuaitau le alii minisita o galuega tetele i fesili a le sui Faipule o le Itumalo Falelatai ma Samatau e faatatau i le tau o le eletise, lea na ta’ua e Olo e taugata, o afi mo Savaii atoa ai ma aitalafu a le EPC i le Matagaluega o Tupe.
Na ta’ua e Laauli i lana lauga e tatau ona faatāua le lafo ona o le tele o tuuaiga faasaga i le alii Minisita o se tasi e iai ona sea i le kamupani a le Green Power.
Sa teena e le sui taitai o le Itu Agai lea tulaga ma ia faapea mai o le fesili sa tuuina mai pe lē o le kamupani lea o loo iai sea o le alii Minisita, ae sa tulai foi le taitai o le Itu Agai ma faapea ana tala na te lei ta’ua ni sea ae sa ia talanoa mai i le aafiaga o le alii Minisita i le kamupani lea ma ta’ua ai na oo atu ia te ia le alii Minisita a o Palemia ma talanoa atu ina ia faamatuu atu le laisene i lea kamupani.
Na pasia le lafo ma ua poloaiina ai nei le taitai ma le sui taitai ina ia avatu faamaoniga o a la lafoga.
Na saunoa le Fofoga Fetalai poo ā faaupuga o loo iai i faamaumauga sa faia o itu tāua ua talia lava le lafo.
