Ua saofagā nei le tasi o fuafuaga a le faigamalo a le Faatuatua i le Atua Samoa ua Tasi, o le faatūina o se pulega e na te tapenaina ma vaaia le ave i fafo o soo se oloa mai Samoa le Samoa Export Authority, ina ua pasia e le Palemene i se tulaga faanatinati i le toe tauaofia o le fono usu a le atunuu i lenei vaiaso, le tulafono taufaaofi e avanoa ai ona faagaioi lea auaunaga tuma’oti a le Malo.

O i le tulafono taufaaofi ma lea fuafuaga a le Malo, sa toe faamanatu mai ai e le ta’ita’i o le Itu Agai, taimi o iai le komiti faatonu o le popo, koko, ma le fa’i i le faamoemoe lava e tapena ia oloa tau faatoaga mo le faatauina i fafo.

Peitai na alu alu ia komiti faatonu a faigamalo ua mavae taunuu i faaletonu o le gau.

Ae i le tali a le Minisita o Faatoaga ma Faigafaiva o le a vaaia le faagaioia o lea faalapotopotoga tuma’oti fou a le Malo, na ia faailoa i le Palemene vaega tāua ua mafua ai lea fuafuaga.

Se vaega o le finagalo o le Minisita o Faatoaga ma Faigafaiva, susuga Laauli Leuatea Polataivao Fosi Schmidt, e tali ai i manatu ma finagalo sa lāgā faatatau i le tulafono taufaaofi ua pasia, o le a faatūina ai le pulega tuma’oti mo le tapenaina o oloa eseese mai Samoa e faatau atu i fafo.