O le faaiuga o le masina nei lea o loo lipotia e tatala ai i tua mai le falepuipui le alii o Manu Vatuvei ma o le iai sana galuega o le a faia mo lana kalapu le Warriors.

O Vatuvei e tolu tausaga ma le fitu masina na falepuipui ai ona o le aumaia ma le sapalaia o fualaau faasāina i le atunuu ae o ananafi na tulai ai i luma o le fono faatonu a le Palola ma ua lipotia mai o le a tatala i tua i le aso 31 o le masina nei.

Ua faailoa i le lipoti a le RNZ se finagalo o le Ofisa Sili o le Warriors o Cameron George na ia ta’ua ai e moni e iai faaiuga le lelei sa faia e Vatuvei i le mataupu ua aafia ai ma e latou te le taliaina foi, peitai o lona tomai e ono a’oina mai ai se lesona ma o le avanoa ua ofoina e le kalapu, o se avanoa part time e fesoasoani ai i le kilivaina o polokalame i tama taalo talavou i tulaga o avanoa ma faaiuga fai.

O se vaega lea o le rehabilitation programme o le a faamatalaina ai le tala i lona soifuaga ia aoina ai se lesona tāua e le autalavou mo le agai foi i luma o o latou olaga.