O se tala faanoanoa mo le amataga o le tausaga fou 2023, sailiga a leoleo i le fia maua o ni faamatalaga e tau saili ai se tamā 55 tausaga o le soifua o afioaga o Asau ma Samata i Tai, ina ua faailoa e leoleo le maua o lea tamā ua maliu.
O le Aso Tofi o le vaiaso na tea nei le vaiaso mulimuli o le tausaga 2022 ua alu atu nei, o le taimi mulimuli lea na vaaia ai le tamā o Tasi Pologa Tuipeā o ia aveina lana taavale, peitai o le afiafi o le Aso Sa muamua o Ianuari 2023 na faailoa ai e leoleo le maua o le taavale i se nofoaga maualalo o se mako i le nuu o Fagafau.
O loo iai le talitonuga na oso ese le taavale ma le auala ma pa’ū atu i le mako ma maliu ai lea tamā. O loo faia pea suesuega a leoleo.
Ae o sailiga i le Aso Sa muamua o Ianuari a leoleo ma mātua o se tamaititi 6 tausaga le matua mai Nuu fou, i le toe fia maua o lea tamaititi, e oo ane i le afiafi o le aso lava lea ae faailoa e leoleo le toe maua o le tamaititi.
O le pitonuu o Ululoloa na maua atu iai e se tagata le tamaititi ma ia faasalalau ai le ata i luga o le api o foliga i le fia maua o mātua ma le aiga o le tamaititi e momoli iai.
