Mai le tele o sui na tusi talosaga mo le maua ai o se vaega tupe e fesoasoani i le tuufaatasia o ni ata pupuu, e toaono i latou ua filifilia nei e faatino a latou poloketi e tauala mai le lagolago a le NZ On Air.
O lenei polokalame o le a mafai ai e tamafanau o le Pasefika o loo aumau i Niu Sila ma nisi o tamafanau o loo i le Pasefika e galulue faatasi ai e tapena ma tuufaatasia ni ata pupuu e faamatalatala ai o latou manatunatuga ma tala tusia e faatatau i le Pasefika.
Ma o lea avanoa e latou te pu’eina ai a latou tala tusia i motu eseese o le Pasefika, e faatino ia latou lava gagana.
Ua faamauina o le uluai polokalame lea i lona faatupega ua faatino e le NZ On Air, ma le galulue ai ma sui mai le Pasefika ina ia mafai ona omai faatasi tagata Pasefika i Aotearoa nei o loo iai le tomai ma le taleni e tuufaatasia ata pupuu ma soo se vaega tau ata tifaga ma sui mai le Pasefika, e galulue faatasi e fausia ma tuufaatasia se uluai ata mo tagata Pasefika lava ia i soo se tafa o le lalolagi.
I le faatino ai o le galuega o lenei poloketi, o loo ta’ua o se vaega o le seleni ua ofo atu e mo le tuufaatasia o pese ma musika fou e faatino lea e tagata pepese mai le Pasefika.
O lea fuafuaga o loo faatautaia e le NZ On Air i le galulue faatasi ai ma le Pacific Cooperation Broadcasting Limited (PCBL) lea o loo faatupeina e le Matagaluega o Mataupu Tau Va i Fafo ma Fefaataua’iga, e unaia ai sootaga valelei i le va o Aotearoa ma le Pasefika e ala i le lagolagoina o lana vaega o faasalalauga.
O poloketi nei e aofia ai “A Dollar to Dream, The War Below: Restoring Hope in the Solomon Islands, Paradise in Peril, The Bride Price, Children of Niue, Rugby Chiefs”.
O le a faasalalau nei ata i luga o faletelevise uma o le Pasefika e aofia ai le TV1 ma le TV3 i Samoa.
Puna o Faamatalaga: Newshttps://www.nzonair.govt.nz/news/nz-on-air-funds-uniquely-pasifika-stories-for-audiences-across-the-pacific-and-aotearoa/
