E le taumate o le a siitia le tau o pasese i faigamalaga ona ua iai nei nisi o galuega faaleleia ua amata i le malaevaalele i Aukilani e faaalu ai se vaegatupe e $3.9 piliona.
O le galuega e pei ona ta’ua i le televise a Niu Sila o le a amata i le domestic ma ua ta’ua foi o le a siitia le totogi o vaalele i totonu o le isi lima tausaga o lumanai.
Fai mai le lipoti e le o fiafia kamupani vaalele i lenei faatatau ma ua faailoa foi i ni pepa o faamatalaga mai le kamupani vaalele a le atunuu le Ea Niu Sila faapea ma le Qantas ua talosagaina ai le malaevaalele i Aukilani i le mataupu lea.
O se faamatalaga a le Ofisa Sili o le Ea Niu Sila, Greg Foran na faia i luga o le Breakfast i le taeao analeila na ia ta’ua ai, e le taumate o lea siitaga o le a pa’ū i luga o pasese e ala lea i le siitia o le totogi o faigamalaga.
Faailoa e le Ofisa Sili o le mea o loo talosagaina o se faamalamalamaga manino lea o le aofai sa’o o nei galuega toe faaleleia a o lei faatino ia galuega.
Ua faailoa i le lipoti le tali ane a le Ofisa Sili o le malaevaalele, Carrie Hurihanganui e faapea o le domestic lava ia ua leva ona mae’a le aso sa faatulaga e oo iai lona faaaogaina ma ua tatau lava ona faatino iai ia galuega.
