Ua iai nei se fautuaga ua tuuina atu faalauaitele e le asosi o loo puipuia le saogalemu o meaola le Animal Protection Society i Samoa, mo aiga tausi meaola aemaise lava o taifau ina ia taofi le toe faaaogāina o le vailaau fana vao le paraquat e fana ai le vao, ona o le mafuaaga lea o le aafia o nisi o taifau ma oo ai ina mamate.

Faaalia e le sosaiete, o nai vaiaso ua tuanai e feololo le numera o mataupu na faaoo atu e faasino i taifau ua onanā ona o le vailaau fana vao.

Ua fautuaina ai e le sosaiete aiga o faalagolago i le paraquat e tape ai le vao, ina ia saili se isi faiga e faamamā ai le laufanua e aunoa ma le faaaogāina o le vailaau fana vao.

O se tasi lenei o mataupu sa laga ai se finagalo o le faamasinoga ma fautuaina le faia o se tapu i le toe faaulufale i le atunuu o le vailaau fana vao, ona o soifua o nisi tagata ua fano ai.

O le taimi nei o loo faaaogā pea le vailaau o le paraquat mo le fanaina o le vao ia pē auā le faamoemoe i le totōina o le laufanua i ni laau tau faatoaga.

O nisi o vailaau oona mo le tapeina lava o le vao e faatoa mafai ona faatau atu i se tagata pe a talosaga i se pemita mai le ofisa faaasu o le matagaluega o faatoaga ma faigafaiva.