Ua silia ma le 10 tausaga talu ona auai le ‘au ‘aau a Samoa i taaloga o Mālō Taupulega talu mai lava le tausaga e 2010 peitai o le taimi muamua lenei ua oo ai se sui o le ‘au ‘aau i le isi laasaga o le taaloga poo le semifinals.
I lipoti a le Samoa Global News ua faamaonia ai o le tamaitai o Olivia Borg le ulua’i Samoa ua ausia lea tulaga. O le vaega o le 50m butterfly i le saosaoa e 0:27:42 na ausia ai loa e Olivia le oo atu i le semifinals. E oo foi i lea taamilosaga na vaaia ai le faatūina e lea tamaitai o le matati’a mo Samoa i lea lava vaega i le saosaoa 0:27:37.
E ui i le finau o lenei tamaitai peitai o nai sekone lava na eseese ai ma lē ausia ai le isi semifinal lona lua. Sa ave le faamalo a le tamaitai faiaoga Suzie Schuster i le taumafaiga a Olivia faapea le ‘au ‘aau atoa. Na ia ta’ua e ui i le tele o faafitauli sa feagai ai ma le ‘au aemaise o taimi faigata o le Koviti e faafetaia le sao ma le finau o Alo na fanau mo se ‘ai mo Samoa.
O le faamoemoe ina ia faaauau ai pea le finau mo nisi taaloga o i luma mo le atunuu.
