Ua tatala se isi faaopoopoga o pisinisi faleoloa supamaketi a le susuga i a Farnkie Cai ma lona faletua o Mayday i le afioaga o Laulii i le agai i Sasae o le motu o Upolu, ma ua maua ai nei le aofaiga e 13 o ia faleoloa tetele ua fausia e lea alii faipisinisi ma lona aiga i lo tatou atunuu.
O se tasi lea o auauaga tau faleoloa supamaketi ua soo ai le atunuu i nofoaga eseese ma nuu ua faagaioia ai, ma ua atili lauiloa ai lea tautua tau pisinisi i Samoa.
O le Aso Faraile ua mavae na tatala ai lea faleoloa supamaketi ua fausia tonu i le nofoaga o loo iai le maketi a le afioaga o Laulii, ma o se tasi o auaunaga ua faaalia e le afioga Leniu Vainiu Te’o, o le a lē toe tuli mai ai le mamao i Apia o isi supmaketi a Frankies mo faatauga.
O le tasi lea o vaaiga ua faaopoopo i se tasi o galuega i totonu o le afioaga o Laulii na umusa foi i le vaiaso na tea nei, o le faatanoavai fou sa fausia e se kamupani mai Saina le China Harbour o loo latou faagaioia le galuega o le vilimaa i totonu o le afioaga.
E 3 miliona le tau o le faleoloa supamaketi fou o Frankies i Laulii ma ua aofia i le tau o le galuega ma le faatauina o le eleele e tusa ma le ‘afa eka ua fausia ai i luga lea pisinisi.
