A o nonofo taofia ai pea i le falepuipui i Tanumalala le to’asefulutasi o tama tane o le nuu o Lefagaoalii, e aofia ai ni matai ma ni taulele’a e faatali lo latou faasalaga e lau i le Aso Faraile nei.
O le Aso Gafua o lenei vaiaso sa tuuina atu ai le finauga a le loia o loo tula’i mo i latou e lagolago ai le talosaga e tatala uma i tua e faatali ai le aso 6 o Tesema e lau ai le faasalaga i le moliaga o le ave faamalosi o se tagata, ma le moliaga o le faaoolima ua latou ioe uma iai.
O le folasaga a le loia o Alex Su’a o loo tula’i mo i latou o loo molia, o loo finau ai e tatau ona silasila le faamasinoga na mafua ona faatino le gaioiga na saisai ai se matai o lea nuu ma tui ai se amo ona sa’esa’e lea e nisi o taulele’a ua molia i le malae kilikiti, ona e tolu faasalaga a le nuu na faia i lē na faatino iai lea gaioiga na te le’i usita’ia.
Na oo foi le finagalo o le nuu i leoleo mo se fesoasoani i le faasalaga e faatula’i ese ma le nuu e le’i usita’ia e le matai na faia iai le togisala.
O le finauga a le loia a leoleo e pei ona tula’i ai le tamaitai loia tuto’atasi le afioga Tofilau Magele Leone Su’a Mailo sa ia faailoa ai i le faamasinoga, e matuiā tele le solitulafono o le ave faamalosi o se tagata poo le kidnapping, aemaise o le faai’uga na faia i le matai na aafia e iai auala faaletulafono i le Faamasinoga o Fanua ma Suafa sa tatau ona uia, ae lē o le faasalaga na faatino, o se taimi muamua ua toe aliali mai ai lea ituaiga o togisala.
I le finauga a le loia mo ē ua molia sa faailoa e Alex Su’a o ,matai o le nuu na faia le faai’uga ae o le aafiaga o nisi o taulele’a o loo molia sa latou faatinoina le faatonuga a matai ma o se isi lea vala e ao ona silasila toto’a iai le faamasinoga.
O le Aso Tofi nei e aumai ai se faai’uga o le a iloa ai le talia ma le teena o le talosaga a ē o molia e tatala i latou i tua i ni aiaiga e faatali ai le aso e lau ai lo latou faasalaga i moliaga o le ave faamalosi o se tagata ma le faaoolima ua latou ioe uma iai.
O le afioga i le faamasino o le Faamasinoga Maualuga susuga Leiataualesa Darrel Clarke o loo tauaveina lenei mataupu tau faamasinoga.
