E toatele ni sui o le Tineimū ma Faalavelave Tutupu Faafuase’i, na tali ma taumafai e tapē se mū tele i itu mātū o Canterbury i nofoaga o Rotherham.
Māua le sasao tele o lea afi ma le tulaga ogaoga na iai i le Aso Sā, amataga foi o lenei vaiaso, talu ai foi tulaga vevela ua iai le atunuu.
I ripoti, na faamauaina ai na tula’i mai lea faalavelave i le ‘afa tonu o le itula e 2 i le aoauli, ma na aafia ai se fale’apa ma sasao i le 100 eka o le fanua o lea nofoaga.
Ta’ua le oo atu i le 17 taavale tineimū na taumafai atu e tali i lenei mū tele, ma e faapea na faato’a maua lava e to’a i le 6 i le afiafi.
E lē gata ina tali atu sui o faalavelave faafuase’i i le lau‘ele’ele ae na māua le tali ma fesoasoani atu o helikopa i le galuega fītā, ma na ta’ua foi le tumau ai o sui i lea nofoaga e mata’itūina o tulaga o iai le faalavelave.
Faamauina na avatu faatopetope o se tasi o tagata tineimū i se helikopa agai i le falema’i o Christchurch Hospital mo togafitiga, ma e māua e lē o se mataupu e fesoota’i i le galuega tau teineia ai o le afi, ae faamanino ua faasolosolo manuia o ia.
Ua toe faamanatu mai ai le Pulega a le Tineimū ma Faalavelave Tutupu Faafuase’i le mamalu lautele, tulaga o le tuuina mai ai i tua o so latou faasalalauga faalaua’itele i le tapu poo le taofia ai o le faia o ni ta’inafi ma le susunuina o otaota ona o lenei vaitau mafanafana ma le vevela.
Ia silafia lelei le matua’i faatama’ia ai o vaega uma o lo latou si’osi’omaga pe a tula’i mai o ni mū talu ai le vevela o le tau ua iai nei.
Puna o Faamatalaga: https://www.rnz.co.nz/news/national/583733/firefighters-helicopters-battling-canterbury-scrub-blaze-amid-sweltering-heat
